هيه يابو علي
خير يام علي شو في ؟؟
تعى (( تعال )) شوف
شو اشوف ؟
شوف هالشوفه بالله
عفش بيت بيجنن ورخيص
وين ؟
ع النت هيني بتفرج عليهم . والله بيتنا صار خرده ومليان كراكيب
اها يعني هلا بيتك صار مو عاجبك خيتا ؟
ياستي (( على قد فراشك مد اجريك))
وانا والله مو قدرتي هلأ اني أغير اشي
وبعدين حضرتك ناسيه انه ورانا علي وسعديه
والاتنين على وش جواز وبدهم (( بقرة جحا ))
لا مش ناسيه بس شوف والله رخيص
ياستي بلا رخيص بلا هم (( ماتفتحي علينا ابواب )) والله العالم بالحال كانك مش عارفه (( البير وغطاه ))
لا عارفه بس
لا بس ولا اشي انسي الله يخليكي
طيب اصلا شو طالع بايدي بدي انسى ان ما كان بكيفي غصب عني
شو طبختي النا اليوم ؟
عملت جاج محشي وفلفلت رز وسلطه
ياعيني عليكي والله زمان . تسلم ايديكي
الله يسلمك . تعال نتغدى عشان كمان شوي بدها جارتنا تيجي ونروح انا وهيه سوى السوق اصلها بتجهز لكنتها (( عروسه ابنها )) وطلبت مني اروح معها
يالله ابو علي بدك اشي اجيبه معي
لأ الله معك
وين سعديه وعلي ؟
علي راح مع صحابه وسعديه بتطرز بغرفتها
بدك اشي
لأ بس كنت بسأل
يالله سلام
الله معك
نلعب النا دور طرنيب الواحد عايف حاله
هات تنشوف مين موجود
هيه هي همسه هون تعى لنسلم عليها
كيفك همسه ؟
هلا فارس كيفك ؟
الحمد لله بخير
شو اخبارك ؟
أنا الحمد لله بخير وهيني قاعد لحالي.
وانتي شو عامله ؟
انا تمام الحمد لله
بس كنت عم بحاول اضبط بيت الشعر
وهو انتي بتكتبي شعر ؟
اه هو أنا ماقلت الك ؟
لا مااجت مناسبه .
وعن شو بتكتبي ؟
والله بكتب عن الاحداث اللي صارت بغزة
اها منيح الله يوفقك
وانت ما بتكتب شعر ؟
لا والله مالي بهيك امور نهائي
طيب اقرأ وقولي رايك
ياعيني عليكي فنانه حساسه والله
وشو بتكتبي كمان
بتحب تقرأ
اه ياريت
طيب هي الموقع فيه بتلاقي كل كتاباتي
ماشي بنشوف بس باين عليكي ماشاء الله
من ذوقك ياغالي
انا هلأ بدي اروح يابو الفوارس عندي شويه شغل بدك اشي ؟
لا سلامتك بس خلينا نشوفك ماتطولي الغيبه بنشتاق الك
تشتاق الك العافيه
سلام
سلام
Falling hearts Here
ليست هناك تعليقات:
إرسال تعليق