من قبل ما تيجي انا حبيتك

وعملتك غنوة على لساني

بالشوق واللهفة استنيتك

ومنايا تضمك احضاني

ياقمر ف السما طالع كامل

وعليه الدنيا بتتحايل

هليت بالنور والله (ياوائل)

نور عيني تنوّرلي زماني

من قبل ما تيجي.... انا حبيتك




*****

باركولي ياناس جالي حفيدي

بقى بيني وبين الفرح ميعاد

ياشموع الفرح خلاص قيدي

دا ميلاده ياناس احلى الاعياد

ياحفيدي يا اعز الولد بجد

لاوسام ولا ابدا زيك حد

ادخل ف الروح بالطول والعرض

وتعالى اضمك من تاني

من قبل ما تيجي .... انا حبيتك

..........................
الفرقة عذاب...
والوحدة عذاب...
والغربة ف قلب النفس عذاب
لكن انتي يا نادية سحابة شوق
ومطرها بينزل ع الاحباب
خليكي طريق مفروش بوفا
خليكي دفا
ومدام الفرح طريقه جفا
ازرعي بساتينك جوا الروح
وافتحي لشعاع الشمس الباب

الحب لو بالايد

كنا وقفناله

ورفضنا بالتاكيد

سفره وترحاله

لكنه شئ مكتوب

يدخل حنايا الروح

وان قولنا مش مسموح

يربطنا بحباله

يا اميرة قلبك طير

فارد جناح الوفا

والحب سكة دفا

مهما تعاندي فيه

قلبك قوام تلاقيه

ساحبك ورايحاله

.................................

......................

صابر على ظلمكم ... طب بس ولامتى؟!

كرباج جحيم حكمكم ... بيلسوع الجتة

يا مأكلين الكلاب بوفتيك على روزبيف

وبتحسدوا الغلبان ... ع العدس لو فتة!!

..........................

قلمي يا شاعر ألم ... م الغدر ليل ونهار

زمن البراءة اتعدم ... واستفحلوا الفُجار

حبرك دموع والبكا ... سرسب على جبينك

لملمت كل الدموع ... وحبستها ف أشعار

.........................

يا معليين السور ... على شر دنيتكم

و مخبيين النور ... والضلمة سكتكم

قولوا وعلوا الصوت ... بالكدب ع الآخر

حتما هييجي صباح .. بالنور يسكتكم

....................................

قصيدة معايدة
فتحية حبيبتي دايما
بالخير افتكري امك
ودعاكي ليها واصل
ترجع بالنور تضمك
وتزورك وقت نومك
تمسح عنك همومك
وان دمعة ف يوم تزورك
تلاقيها تحوشها عنك
بالخير افتكري امك
..............................

احلى كلمة ام طالعه
بالدعا ويا الوصية
مرفت النسمة الجميلة
بنتها مريم ماريا
صبحها اجمل بداية
وشها ياخلق آية
لو سألتوا ع الحكاية
تلقوا قلبي عشقها هيّ

كلنا من اب واحد
مؤمنين والرب واحد
ليه نلاقي ما بنّا جاحد
ف الشروق بيجيب مغيب
اي فتنة مش هتنفع
للجرس وادان هنسمع
مهما يحصل برضه يطلع
السبب دايما غريب
وانتي يا مصر الامان
شعب واحد من زمان
ف السما نورك يبان
الهلال حاضن صليب

احلفلك يا اميرة بربي / ف عيونك جنة بانهارها / لو قولتي الأه قبلك قلبي / ياملاكي بيسبق ويقولها / ماهو جوه عنيكي ياميلا بروح / وبشوفك قلبي وروح الروح/ من دمعك قلبي يبات مجروح /و افديكي بايامي بحالها

كارت معايدة

كارت معايدة

..................

إستناني أكيد رجعالك

بعد ما لم دموعي الشاردة

روحي ساعتها هقدمهالك

ويّا القلب ف كارت معايدة

وانت اوعدني تاخدها ف حضنك

وتدوبها ف شريان قلبك

تشبع منها وتشبع منك

أو تزرعها ف قلبك وردة

*****

سيبني ألم جراحي بسرعة

وارجعلك بالصبح النادي

نفسي أجيب تورتاية وشمعة

وابدأ أول عيد لميلادي

بس الماضي اللي معذبني

مستنية يروح ويسيبني

خايفة عليك تتعذب مني

لما تحس بناري القايدة

إستناني أكيد رجعالك

بعد مالم دموعي الشاردة

*****

أحلفلك بالله يا حياتي

إنك أغلى كمان من روحي

بس انا خايفة عليك م الماضي

خايفة يبان وتحس جروحي

سيبني ارجعلك تاني وليدة

نبدأ قصة حب جديدة

سيبني أدوب مع صوت تنهيدة

من جواك والعالم شاهدة

روحي ساعتها هقدمهالك

ويّا القلب ف كارت معايدة

.................................

عشاق بصحيح

عشاق بصحيح

...................



وبقينا اتنين عشاق بصحيح

من بعد ما كنا اتنين مجاريح

الشوق بالشوق خد بايدينا

ومشينا معاه على حسب الريح

عشاق بصحيح

*****

الدمع اللي صاحبنا فارقنا

وخلاص ما بقاش أبدا أنّات

والدنيا اهي بدأت تصالحنا

والجرح خلاص بقى عدى وفات

الحزن اتحول لسعادة

والضحكة بقت هي العادة

اديتنا الدنيا وبزيادة

حبة تفاريح

والشوق بالشوق خد بايدينا

ومشينا معاه على حسب الريح

عشاق بصحيح

*****

كان وحده وكنت كمان وحدي

الدنيا بقسوة تطوحنا

كان حتى النسمة اما تعدّي

نلاقيها بتكسر ف جناحنا

وقابلته وسلمت بكفي

بحنانه وطبطب على كتفي

اداني الحب اللي يدفي

من برد الريح

عشاق بصحيح

*****

كدب عيونك

كدب عيونك

....................

رجعلي القلب اللي جرحته

من قبل ما ترجع تصالحني

انا كدب عيونك صدقته

اتاريك بسهولة بتهجرني

اديتك قلبي وتلعب بي

خلتني احس هواك ذنبي

دلوقتي عليك بسأل قلبي

ولأول مرة بينصفني

منا كدب عيونك صدقته

أتاريك بسهولة بتهجرني

*****

القلب خلاص الكيل فاض بيه

من قسوة قلبك وعمايله

كان يدّي وكنت بتقسى عليه

ولا مرة تطبطب وتحايله

دلوقتي خلاص هجرك هده

بقى دقه عشان نفسه لواحده

دلوقتي بيعلنلك صده

لو جيبت النجم المتحنّي

منا كدب عيونك صدقته

اتاريك بسهولة بتهجرني

*****

مانكرش ان انا كنت بحبك

لكن قررت خلاص انساك

وان حد ف مرة يجيب سيرتك

راح احطه ف نفس الصورة معاك

لو حتى هغيّر من كوني

وأعيد تفكيري وتكويني

ولا اني اروح للي كاويني

ولا اسمح لخياله يزورني

منا كدب عيونك صدقته

أتاريك بسهولة بتهجرني

..............................

اشرب

اشرب

.................

قلبك دا حبل غسيل

والحب كام فستان

طول النهار والليل

تنشر وبالألون

لكن انا ما اقبلش

اتحط ف الطوابير

انا قلبي حبه كبير

علشان انا انسان

*****

مش هرضى اكون مركون

ع الرف لما تميل

ولا هرضى ابقى نهار

ترميه ف سواد الليل

انا قلبي طاقة نور

يابو قلب صابح بور

عليت ما بنّا السور

بالغدر والهجران

اشرب وبالألوان

*****

لو قلبك الجاحد

راسمله ميت رسمة

أنا ف العدد واحد

ما اقبلش ع القسمة

سيبتك تروح عندها

وتدوق مرار غدرها

م انت كمان زيها

حية ولقت تعبان

اشرب ... وبالالوان

...........................