ام علي (( 12 ))

هيه يا علي وينك ؟
هيني هون شو بدكم ؟
شو شو بدكم هاي متحكي عدل معنا ياولد ,
ليش شايفني مقلوب مهيني بحكي منيح
طيب تعال خدني قلمين مش احسن ,
شو بدك هلأ يابا ؟
شو بدي يعني بدي افهم لشو الك يومين مو رايح الشغل
ولااشي تعبان وحيلي مهدود وتعبت من هالشغل شو كله شغل شغل؟
ياسلام وشو عملت لنفسك عشان تحكي هيك ؟
وشو عملت لمستقبلك منت بدك (( فت عدس )) لتتجوز وتفتح بيت والا مفكر الشغله بتجيك عالبارد المستريح ليكون ؟
لا مش عالبارد بتيجي بس مابدي هالشغله هلكتني وانا لسا ما طبقت العشرين ,
ياسلام ولو مااشتغلت هلا متى بفكرك تشتغل لما تكبر وفعلا مايكون عندك حيل ؟
لا بس صاحبي بيدبر الي هاي اللي بيقولوا عنها كارد وراح اسافر امريكا واشتغل واكمل تعليمي كمان
يا سلام ومين صاحبك هاذ بلاصغره؟
واحد اتعرفت عليه من النت وهيو شغال وكلها كام يوم وبيطلعها .
اها وعشو شغال ليكون لسواد عينيك
وهو اي واحد بيحكي الك اشي بتصدقه؟
وبعدين مافي شي بيجي بالهين ولا بلا ثمن شو راح يستفيد منك ليعملك وانت قاعد ومرتاح ؟
ليش هو لازم يستفيد؟
ها شو فكرك بيعمله الك هيك لباب الله ؟

واحد يادوب بتعرفه عالنت والله اعلم شو هو دينه ولا شو هدفه (( وطب طبتك العافيه )) بنصدقه ؟

يعني لازم نشك بالعالم ع طول؟

لا مو قصه نشك بس الله ماشافوه بالعقل عرفوه,

يابا يا حبيبي صدقني بكره بتشوف,

يا حبيبي ولو فرضنا ان كلامك صح وبيعملك لشو تخسر شغلك هلأ قبل ما تضمن

(ماتقول فول ليصير بالمكيول).

وساعتها يبقى فرج بس نتطمن مو هيك يابا يا حبيبي تضيع مستقبلك عشان واحد من النت

(( مو معروف قرعه ابوه من وين )) ونوقف حياتنا بانتظاره ,

والله كلامك صح يابا وان شاء الله خير

ان شاء الله ماحد بيكره يا حبيبي بس ماتسمح لحد يلعب فيك وين عقلك يابا؟

ماشي يابا مابتكون الا راضي ان شاء الله