ارجع تاني

عمر القسوة ما كانت طبعك
اتعلمت القسوة منين
يبقى القلب ملاك بيحايلك
وانت بتبعد بالشهرين
طيب فكر ف اللى نهارها
هو نهارك
واللى تسيب الدنيا وتمشى
معاك مشوارك
واللى حياتها وكل أمالها
تشاركك دارك
ما تفكرش اللقمة الحاف
حتاكلها منين
اتعلمت القسوة منين
فكر وارجع
والا اقولك
ارجع من غير التفكير
حس الروح التايهة ف بعدك
زى الموجة ف بحر كبير
قلبى خلاص اتجن بيسال
راجع تانى ؟
والا حبيب القلب اتغيّر
قلبه كمان حب التغيير
كنت زمان على باب الحارة
واقف طول الليل سهران
كنت تنادى النجم العالى
ف اى مكان
تساله عنى وقلبك تايه
زى غريب مالهوش عنوان
واما اغيب عن عينك ثانية
كنت تحس الثانية سنين
اتعلمت القسوة منين
قادرة اخلص تارى واخاصمك
ابعد عنك
قادرةاسيبك حاير تايه
قادرة أجنك
بس القلب الاخضر حالف
يفضل عاشقك
مانت القلب النابض فيّا
وانت النور والهوى والمية
وانت العين
ارجع زى ما كنت حبيبى
ارجع يا أمير العاشقين
سيب البعد لواحد تانى
سيب القسوة لناس تانيين
اتعلمت القسوة منين