ما بتسواش

فاكر نفسك حاجة كبيرة **انت ف قلبى مابتسواش
قلبى اللى انت مليته بحيرة **شاف من بعدك نفسه وعاش
كنت تبيع الحب ف ثانية **كان القلب جريح وضحية
كنت ف قصر هواك الجارية **اى مكان لهواك ما بقاش
انت ف قلبى ما بتسواش
حب جديد خبّط على بابى **رجعلى الاحلام الضايعة
شال من جوه القلب عذابى **حط الضحكة مكان الدمعة
وانت بقيت قصرك مهجور ** لما خنقت شعاع النور
بكرة حييجى عليك الدور **تتمنى النور وما تلقاش
انت ف قلبى ما بتسواش
قلبى خلاص بقى ملك لغيرك **شايله ف نن عينيه من جوه
سيبنى ف حالى وراعى ضميرك **انا فعلا حبيته بقوة
جابلى الجنة ف ايده وجانى **نسّانى الماضى ونسّانى
غدرك جرحك كل زمانى **من غيره الدنيا ما تحلاش
وانت ف قلبى ما بتسواش