الأيام كام؟

الأيام كام؟
.........

شوفتك يا حبيبى قمر طالع

والليل عطشان للنور ويّاك

شوفتك نسماية بشوق جاية

تحدف أغنية على الشباك

مش عايزة أقوم م النوم علشان

ما تضيعش الصورة من الأحلام

أتاريها حقيقة ما هيش أوهام

واتارينى بنن العين شايفاك

***

وليالى البعد اللى خدتنى

ورمتنى على بحور الحرمان

جرحتنى بقسوة وخلتنى

محتارة وتايهة ماليش عنوان

أتمنى الموت ولا بيجينى

وأعيش فى عذاب كل سنينى

ادعى اللى خلقنى يخلينى

أتحول نجمة تهيم فى سماك

***

كان ييجى الليل أبكى واقولك

تصبح ياحبيبى فى جوايا

وأمد إيديّا أجيب صورتك

أحضنها وأعملها غطايا

وما كنتش أبدا بعرف أنام

سهرانة أعد الأيام كام

تغلبنى دموعى ف لحظة انام

ماهو يمكن اكون فى الحلم معاك

***

ورجعت حبيبى قمر طالع

والليل عطشان للنور ويّاك

.............................

كارت الدعوة

كارت الدعوة
................

كان قلبى زمان

بيحب وكان

بيشوفك دنيا وحضن أمان

أول ما تغيب

الشمس تغيب

والليل بيجيب دمع الأحزان

ساعة ما تعود

يبقالى وجود

مش بس وجود.. يبقالى كيان

لكن كان قدرك يوم تغلط

قدام البحر ف طبرية

وتنادى عليّا بإسم غريب

ولا جاش على بالى تكون هىّ

معقولة..دى كانت شئ مني

وتهون الروح ولا هىّ تهون

دنا كنت أصدّق على نفسى

ولا اصدّق لحظة عليها تخون

لو فاكر ما نطقتش كلمة

ولا دمعة عين نزلت مني

فكّرت ساعتها ان الصدمة

حوّلت الدمع لباب قلبى

روّحت إزاى؟ أنا مش فاكرة

إنهارت .. دا شئ أنا مانكرهوش

والدمع انحاش مش م الصدمة

دا انحاش عشان انت ما تستهلوش

شهرين ولقيتها قصاد مني

جايالى تخبّط على سهوة

والدمعة اللى انحاشت مني

إنهارت على كارت الدعوة

لو كانت حرب مابين أعداء

على أرض ودين وكيان ومصير

هتلاقى قلوب رغم الصواريخ

فى الحرب تكون أرحم بكتير

لكن انتوا أكيد مش بنى أدمين

ولا فيش جواكوا قلوب بتحس

أنتم شياطين فى الليل عايشين

شايفين العالم إنتوا وبس

سنتين وانا عايشة ومش عايشة

واحتاروا الأهل ف ايه جالى

التوهة تاخدنى وفى ميعادك

أنده على إسمك طوالى

دلوقتى خلاص قلبى رجعلى

واتعلم بس يعيش ليّا

وكرهتك وكرهت حروفك

وكرهت البحر ف طبرية

......................

مش غريبة

مش غريبة

لما كل الناس تحبك

مش غريبة

لما كل الناس تخبى

بس صعب حبيبى تلقى

قلب عاشقك زى قلبى

انت ليّا صبح نادى

جه يبوس خدى و عيونى

واما فجأة الليل ينادى

تبقى فى الاحلام نجومى

إنت عينى ..إنت قلبى

إنت روحى وبيك أكون

غصب عنى.. حسة إنّى

دايبة فيك حب وجنون

شايفة كل الدنيا إنت

النهار والحلم إنت

حتى شايفة الجنة إنت

جوه فى القلب الحنون

شوفت ليه دايما بقولك

مش غريبة الناس تحبك

مش غريبة الناس تخبى

بس صعب حبيبى تلقى

قلب عاشقك زى قلبى

..................

رسول الغرام

طبع البشر خدّاع

واللوم على اللايمين

الصدق لو يتباع

واعرف طريقه فين

أمشيله ميت مشوار

وأجيب ولو قيراطين

أبنى عليهم دار

ملجأ لكل حزين

والكدب لو يوم ساد

هختارلى ناس تانيين

تنسى نفسك

إوعى تسيب أملك يتسرسب

بين دهاليز الخوف واليأس

إوعى الليل الفارد إيده

يدفن حلمك جوه الأمس

إقطع كل خيوط العتمة

هات من قلب الضلمة الشمس

واما تحس العالم ظالم

عيش علشانك انت وبس