الله أكبر ع الساكت
على كل شيطان
الله أكبر على أمة
ما بقيتش أمان
الله أكبر على حاكم
مش همه الدين
الله أكبر على جيشنا
صفين نايمين
يترحّموا زى المشاليل
على جيش حطين
والخلق ساكتة على الكفار
والدين يتهان
..........................................

فلاحنا ف كل وطنا خلاص

ما بقاش فلاح

ولا شجر الصبر على كفوفه

بيطرح تفاح

علشان الطيبة اللى ف قلبه


من بعد ما ديّر سجادته

للغرب وحط هناك رايته

كل الخير راح


..............................................

الجسم هزيل

والعقل الحاكم قلبه بخيل

عايز يستحوذ ع العالم

وقصاده الناس كلها تماثيل

فما تستغربش لاى قرار

طول م القرارات من عقل قابيل

رد : مجروح قوي

تبقى بره المسرحية....

تبقى جوه المسرحية

مش حتفرق فى الرواية

أصل من بدء الحكاية

والحقيقة هى هى

إنت غير صالح يا صاحبى

للبطولة

إنت كومبارس الحياة

وأما تعلا

بس تصبح بهلوان

كل دوره شقلبة وهز الودان

لجل ثانية واحدة يضحك

إبن السفير

وإبن الغفير

وإبن ال..............

أما انت يا إبن ال....

فقير

إوعى يوم تحلم بإنك

تبقى شئ فى الدنيا ديّا

ومش حتفرق

تبقى جوة المسرحية

تبقى بره المسرحية

إنت من بدء الحكاية

عالة جت للانسانية

..........................................

الود شجرة توت

ترمى الظلال ع المدى

وتنسّم الملكوت

والصد شجرة سم

من داق ثمارها.....

يموت

..............

كنت فى عينك نجمة بعيدة

حاجة عليك يا حبيبى جديدة

واما بقيت جنبك تتهرّب

لأ يا عنيد انا برضه عنيدة

أى دموع حتشوفها عينيّا

هتزيد جوه القلب قسية

راح ابيعك وأبيع الدنيا

وارسم دنيا واعيشها وحيدة

وان ما قدرتش يبقى نصيبك

بعد ما تشعر إنى ف إيدك

فجأة ف لحظة تشوفنى بسيبك

بين اهه ودمعة وتنهيدة

منا يا عنيد فى الحب عنيدة

..........................

ياليلة العيد

ياليلة العيد يا بشرة خير

وفرحة بعد شهر صيام

يغنيلك شجر مع طير

ونفرح بك تلات تيام

بنلبسلك جديد فى جديد

ونسهر لما فجر سعيد

وبعده نروح نصلى العيد

ونزعل لو خلصتى قوام

ياليلة العيد

لوكات ذنوبك جبل

رب العباد غفار

والرحمة سبقت غضب


من أول المشوار

أدم أبونا عصى

والتوبة كات مخلصة

ذنبه الكبير اتنسى

والجنة مثوى ودار
......................

الأم نهر حنان
والأب شجراية
يجتمعوا حضن أمان
نسمة وضلاية
إيه م الزمن عايزين
غير ضحكة فى عنينا
يشقوا عشانّا سنين
ويطبطبوا علينا
بدعى لاله غفار
دعوة ضعيف محتار
فى نهاية المشوار
الجنة وكفاية
................................

ما تلومش يوم ع الزمن
قلب الزمن مسكين
طيب وطبع البشر
فوق الزمن دايسين
اللوم على اللى يخون
وعليه حبايبه تهون
عمر الزمن ما يكون
غدار يا بنى ادمين
.....................................

هات عينيك قدام عينيّا
الكلام دا قاصده ليّا
لو كدبت زمان بكلمة
إوعى تكدب مرة تانية
لما قولت انك نسيتنى
كنت عارفة انك فاكرنى
واللى مانتش فاهمه ابدا
إن بُعدى غصب عنى
واما جيتلك فاردة ايدى
إنتى مين؟ بتقولها ليّا
إوعى تكدب مرة تانية
ألا لو فكرت أبعد
دنيتك ما تكونش دنيا
إوعى تكدب مرة تانية
إوعى تكدب مرة تانية
................................