مولاى أنا عبدك

جايلك وانا الجانى

طالب ببان عفوك

وذنوبى سابقانى

إغفرلى يا رحمن

بركة ساعات رمضان

وشفاعة القران

طهّرنى من تانى

..............................

ام الذيول غربان

قلب الحقايق سمة

عند اللى باعوا الشرف

والنار تزيد كلما

فشلوا فى صيد الهدف

تنبح كلاب السكك

أم الذيول غربان

ويزيدوا فى الهوهوة

كل النهار ما يبان

وعشان نهارى الصبى

راجع بشئ مختلف

شعلل فى نار حقدهم

بالغل جاتهم قرف

لكن أكيد هيبان

للناس قذارتهم

واهو كل شئ بأوان

والكل راح يتعرف

....................................

من مسرى رسول الله ببعت

من قلبى لكل حبايبى سلام

وبهنّى بشهر كريم قرّب

ويعوده علينا بخير وأمان

ويارب توفّق خطوتنا

واتقبّل صومنا وصلاتنا

ايه أجمل من خير لمّتنا

وقرأن رمضان

من مسرى رسول الله ببعت

من قلبى لكل حبايبى سلام

.....................................

تهنئة بشهر الصوم

رمضان مش شهر يا دوب ويفوت

رمضان ملكوت

ويارب نعيش فى جمال يومه

بنقوم ع الخير وننام عالخير

فى قيام الليل ونهار صومه

من قلبى بهنى الكل واقول

بلغنا يا مولانه قدومه
............................

رباعيات الحب وعمايله

مديت ايدين الهوى

لأهل الهوى سلامات

دابت حبال الهوى

من كدبة البسمات

يا قلبى يا مبتلى بالحب امتى تتوب

فى زمانّا شكل الهوى

بقى بس كلمة.....هات

.................................

أيوه مش مفروض تعيش

إنت مين يابو عقل لاسع؟

جى تفكّر؟!

يبقى حتسبب مواجع

للحكومة والوزارة

وانت أحقر م الحقارة

وف قانونهم تلقى تمنك

ما يساوييش حتى السيجارة

وانت سايق فى المعارضة

زى شبكة ناقصها عارضة

ما تساوييش....

كل ساعة جى نافش

بالكلام جناحين وريش

دانت مش مفروض تعيش

انت مش مفروض تعيش

...............................

علشان الدنيا ترجع

وضمير الناس يفوق

لازم من جوه منّا

نفرش ع الأرض ضوء

وبحبة من إيمانّا

حنعود أجمل ما كنّا

مش أى بريق ياخدنا

بسذاجة نقول شروق

...........................

يأس

ومهما تحاول الريشة

حتطلع صورة بهتانة

عشان الدمع خلانا

بنتكحّل بليل داكن

ما فيش ألوان ... ما فيش لكن

ما فيش قمراية تروينا

بضى برئ

ولا نجمة تبل الريق

ما فيش غير الدموع تروى

ولما تفيض....

بنملا للزمن أباريق
........................................

صفر كبير

سنين مغشوشة فى صحابى

وشايفة الضحكة فى عيونهم

فردت القلب ضلاية

ونسمة شوق بتحضنهم

اتارى الضحكة دى كدبة

وظاهر حبهم كدبة

وكدبة تجر كام كدبة

ويملوا القلب بسمومهم

انا المخدوعة فى صحابى

وانا المطعونة كام طعنة

ورغم جراحى بتبسّم

وأفرش ف الطريق حنة

أدارى الشوك بعيد عنهم

واحط الورد فى كفوفهم

يموت الورد من نارهم

وفاكرة ف قلبهم جنة

انا الساذجة ومن طيبتى

ما شوفتش ليلهم الحالك

ولا الحقد اللى ماليهم

برغم الحقد كان هالك

وواخداهم سنين منّي

وف عيون العيون ننّي

وهما بقسوة رامينّى

لسكة غدر ومهالك

يا قلبى خلاص بلاش تبكى

وادفن حبهم فى البير

مادام حبك مالوش نايب

ولا باين لهم تغيير

وبحساب الحساب ياخدوا

بعدل الدنيا صفر كبير

( جنتكوا كافرة )

إفتكرت قلوبكوا خضرا

فيها حتفرّع ورودى

التقيت ف عيونكوا جمرة

قاصدة تحرق منى عودى

الجحيم اللى ف قلوبكوا

حقد ناره ف يوم تاكلكوا

أما وردى بره عنكوا

بكره حيزيّن خدودى
...........................................

قلبى كان فارد جناحوا

فى الهوا قاصد سماكوا

فكره أيامى اللى راحوا

بالهنا حتعود معاكوا

إتخدعت وكنت فاكرة

جوه منكوا نور لبكرة
التقيت جنّتكوا كافرة

والإيمان راسم حدودى

.....................................

أسفة جدا مش طريقى

سكة الحقد بتاعتكوا

قلبى وبحلمه الحقيقى

فى النهار قادر يدوسكوا

إنتوا أكبر كدبة كانت

ويّا أول فجر بانت

ضحكة صفرا ف لحظة خانت

دوستها وغنّيت نشيدى

.................................