الخميس، 30 يوليو 2009


ما قدرش يحلم بالسفينة

فى الطوفان

الموج سرق حلمه العبيط

السيف ورق

وحصان خشب

إزاى حيفتح بوابات

فى زمن لقيط

والسندباد

مركبته فيها ألف شرخ

إزاى يفوت الشط

أو يدخل غويط...؟!!

...................................
مرسلة بواسطة في ليست هناك تعليقات:

الأربعاء، 29 يوليو 2009


إزاى عبير الورد

حيفوح على دارنا

واحنا بنروى الورد

بعرقنا ودموعنا

وازاى حننسى الأه

والجرح جوانا

ندى الغريب القوت

وننام على جوعنا

وياريت فى كلمة شكر

دا الحقد واكلهم

ياخدوا النهار البكر

ويداووا فى جروحهم

واحنا النهار زرعنا

الطرح مش لينا

حتى فى ليل الهم

بيطفّوا فى شموعنا
مرسلة بواسطة في ليست هناك تعليقات:

الاثنين، 27 يوليو 2009


إنسان شجاع.. إزاى يكون

وفى الأوهام سنين عايش

وسايب عمره للأمطار

وحلمه فى الربيع بايش

ما تنتظريش يجيبلك نور

دا مركب والشراع مكسور

ولو حاول يعدّى السور

حيفضل برضه ع الهامش
.....................................
مرسلة بواسطة في ليست هناك تعليقات:

الأحد، 26 يوليو 2009


رغم العناد

رغم الغياب

رغم ان نور الشمس

مداريه السحاب

فى لسه حاجة

جوه منّا تشدنا

وبإيدها تفتح للّقا

ميت ألف باب

دا الحب فى عيونك حبيبى مركبة

قادرة تشق البحر

وتهد الصعاب

نتعب سنة

ونتوه سنة

لكن أكيد صوت حبنا

هيجيبنا بعد الإغتراب

دا الحب طفل بيتولد

أجمل ما فيه......

حبة عذاب
................................
مرسلة بواسطة في ليست هناك تعليقات:

السبت، 25 يوليو 2009

سنة سعد عليكى هنيالك


يوم ورا يوم ورا يوم يا حبيبتى

يبقوا شهور وسنين بتعدى

وانت يا هالة يا اجمل هالة

زى نسيم ع العمر يهدى

حاجة غريبة

كل نجوم الليل مرصوصة

اللى بترقص واللى تغنّى

حتى القمر العالى قصادنا

قرّب حبة وجى يهنّى

جى ياروح القلب عشانك

يحدف نور ع البيت ويشارك

ماهو مش يوم وخلاص هيعدّى

لأ يا حبيبتى

دا شهر ميلادك

وانا من قلبى يا قلبى بقولك

سنة سعد عليكى هنيالك

سنة سعد عليكى هنيالك

................................
مرسلة بواسطة في ليست هناك تعليقات:

عقبال الجامعة يابنتى


ونجحتى يا أجمل دانا


عقبال الجامعة يا بنتى


والكل يغنى معانا


على نغمة دانا حبيبتى


يا ضنايا يا نبض وريدى


دانجاحك كان يوم عيدى


وانا مالكة الدنيا بإيدى


بشهادتك لما نجحتى


*************

فى عنيكى لمحت الفرحة

وكأنى بطير فى النور

ولقيت الدنيا الجارحة

صبحت بساتين وزهور

كل العصافير بتغنى

تبعت مراسيل وتهنى

واخدين الفرحة دى مني

ماهى دانا دى بنتى لواحدى
عقبال الجامعة يا بنتى
***********

وحياة سهرك يا حبيبتى

للصبح تذاكرى دروسك

وانا جنبك وانت ف حضنى

قلبى بيدعى وبيبوسك

واله الكون ويّانا

شاهد على كل شقانا

ولا خيّب مرة رجانا

وعطانا كتير ونجحتى

عقبال الجامعة يا بنتى
**********
مرسلة بواسطة في ليست هناك تعليقات:

الأربعاء، 15 يوليو 2009

رد: وفكرانى

مافيش مجهول ولا حاجة
لكن الذنب ما بيديش
انا نهر الحنان لكن
فى ناس تاخد ولا بتديش
وناس عايشة على الهامش
وناس مش لاقية حتى تعيش
ونفس اللحظة فى عالم
بتشرب دم ناس بشويش
تمز نعامة عالسفرة
وتعمل مرتبة بالريش
وانا شايفة ودمعى دم
عشان بابى اتملا دراويش
مرسلة بواسطة في ليست هناك تعليقات:

الاثنين، 13 يوليو 2009


وليه ضاعت خطاوينا

وليه البُعد عطّشنا

برغم الميّه فى إيدينا

تعالى نعيد زمن ولّى

نعيد اللمة والشلة

ونشقى بس ما يضرش

عرقنا بشهده يروينا
................................
مرسلة بواسطة في ليست هناك تعليقات:

الجمعة، 10 يوليو 2009

*** أنا عايشة بيه ***


مع انه طالع من زمان


لكنى لسه بلمحه



يمكن عشان قلبى اللى كان



تايه سنين عن مطرحه



دلوقتى بقى حلمه الكبير


يفضل فى نن عنيه أسير



عصفور ورافض يوم يطير



من قلب حضنه مريّحه


*****
فاتت شهور وانا مش هنا


مع إن قلبى كان طبيب


وكأنى بيه عايشة أنا


مع كل دقة بقول حبيب


علمنى أندم عاللى كان


وانسى اللى فات أيام زمان


منا شوفت فى عنيه الأمان


يا حبايبى مع قلبى افرحوا


*****


يخاصمنى أبقى خايفة موت


واكتبله بدموعى التماس


يجاوبنى قلبه بأحلى صوت


يا حبيبتى م سامحتك خلاص


وافضل حريصة ف كل شئ


خايفة على قلبه البرئ


من أى نسماية ف طريق


تدخل فى لحظة وتجرحه


منا قلبى أه عصفور أسير


لكنه رافض يوم يطير


من حضن قلب مريّحه
...........................

مرسلة بواسطة في ليست هناك تعليقات:

حبة رتوش


لحظة سقوط الأقنعة

حتما يبان

مين اللى خاض المعمعة

ومين الجبان


مين اللى لابس ألف وش
من الوشوش

مين اللى حقده بيداريه

بحبة رتوش

مين اللى فى الكدب اتعجن

مليون لسان

مين اللى كان

ملفوف بتوب قديس سنين

أما الحقيقة مجردة

جواه شيطان
مرسلة بواسطة في ليست هناك تعليقات:

الثلاثاء، 7 يوليو 2009


أقولك إيييييه....

أنا زيّك قسيت ياما

عطيت الحب من قلبى

وقابلوا الحب بخيانة

حميت غيرى من المطرة

رمانى الغير فى دوامة

لكن قلبى اللى عاش يدّى

مازال يدّى

مازال قادر

يبيّن للجميع بسمة

ونهر الدمع فوق خدّى

مازال قلبى الخضار قادر

يغنّى مهما يتوجّع

مازال حالم

ما زال فاهم

بإن الليل أكيد راحل

وفجر الحب راح يرجع
....................................
مرسلة بواسطة في ليست هناك تعليقات:

وانا ما طلبتش تنسى غرامى

أنا ببعد وانا عارف ذنبى

حتغرّب علشان أحلامى

تتحقق بوجودك جنبى

لما ارجع وشايلك مهرك

وأجيبلك الجنة لحدك

وأحس انى صحيح أستاهلك

أفردلك فى طريقك قلبى

والشجرة المايلة على غرامنا

على طعم الاحلام حتغنّى
.............................
مرسلة بواسطة في ليست هناك تعليقات:

الأربعاء، 1 يوليو 2009

رد . انا اسفة


عارفة يا أجمل ما فيّا

مهما كان القلب سامحك

إرمى كل الجرح ليّا

وف محيطى صُبى بحرك

وان زمانّا ف يوم عاندنا

راح تلاقى القلب جنة

والطريق مفروش بحنة

دوسى ع الأيام بقدمك

قلبى ملك إيديكى إنت

إجرحى00 حتداوى إنت

ياللى كل الدنيا.. إنت

قلبى مش محتاج لأسفك

قلبى محتاج مد إيدك

دمى الحاضن وريدك

جنتى الساكنة عينك

بس ده يكفينى منك
مرسلة بواسطة في ليست هناك تعليقات:
الاشتراك في: الرسائل (Atom)