نصيبك يا شاعر نجومك تغيب

وتشعر فى عز الشباب بالمشيب

لكنك حتفضل

وقمرك حيكمل

وقلبك حيعزف غناوى الحبيب

ولو شمس غابت

مسيرها حترجع

تزيح الغيامة

بنورها وتطلع

ونجمك ساعتها حيقرا ويسمع

بانك يا شاعر فى قلمك طبيب

قدرنا عينيها تخطفنا

ونفرد فى الهوا شراعنا

فى أول حضن بتطبطب

ونص الحضن تحدفنا

مع التيار

نصارع موجها ونعافر

فوز فى صراعنا نتفاخر

تمد ايديها ع الأخروتخنقنا

بلا إنذار

أتارى الحضن مش جنة

ولا حنة

دا كان بركان

لكن نايم

ولما قام....

رمانا بقسوة

جوة النار!!....................

ما تلومنيش

..................

فاكر...

لما ناديت على قلبك ييجى

وما سمعنيش..

راجع...

لما خلاص اتعوّد قلبى

لواحده يعيش

لأ يا حبيبى خلاص ولا ينفع

أى دموع مش ممكن تشفع

زى ما جيت من بُعدك إرجع

إنت البادى بظلمك ليّا

فما تلومنيش

شوفلك توب واسع ينفعلك

أما انا توبى قديم على قدى

عدى السما بالغش ف حلمك

بس الأرض دى ملكى لواحدى

واما الريح تتحوُل ضدك

لما تبان للكل حقيقتك

عيش فى جزيرة جرح لواحدك

ما تنادينيش

قلبى العاصى بجرحه إتألم

لكن تاب بعد التفكير

بعد ما حبك واحده اتعلُم

إن غرامك ذنب كبير

ياللى هواك مالهوش عنوان

تايه بين جرح وأحزان

إبعد سيب الفجر يبان

عايزة ادوق من طعم الدنيا

عايزة أعيش

م انت البادى بظلمك ليّا

وما تلومنيش