قول يا قلم
علشان خلاص
ما بقاش رجال يتكلموا
كل العيون صابها العمى
كل العقول متلتّمة
كل القلوب صبحت بوار
التلج ما يخلفش نار
قول يا قلم
يمكن تحقق حلم أولادنا الصغار
يمكن كلامك دانة لما تنفجر
تحيى اللى ماتوا من سنين
لكن حذارى يا قلم
ساعة ما تيجى تنفجر
بقى انفجارك بس
تشجب أو تدين
............

ف إيد رضوان

ف إيد رضوان

...............

برغم البُعد والمسافات

يا أمى برضه حسّانى

تحسى الدمعة جوايا

ألاقى عينيكى حضنانى

وينطق قلبك الأهه

دا قبل ما تيجى ف لسانى

واقولك إيه.....

وحشتينى؟

أكيد حسّه

برغم البُعد والمسافات

أكيد حسّه

وانا عارفة

فى كل صلاة بتدعيلى

لكن مشتاقة يا أمى

أعود طفلة

على حجرك أنام واحلم

وبين حضنك تدفّينى

منايا تعودلى لو لحظة

ليالى زمان

وادوق يا أمى من شهدك

حنين وحنان

وكلمة ماما أنطقها

وأتهجى الحروف ألوان

وابوس قدمك...

عشان قلبك....

يا أمى جنة الرحمن

واشوف ف عيونك الدنيا

أبوس قدمك كمان وكمان

واردد ماما كل صباح

وكل مساء وكل أوان

تمُر حروفها قدامى

سحابة ميّه للعطشان

ف اتشعلق فى أول حرف

عشان أخره يا أمى أكيد


كما السبحة ف إيد رضوان

نخرجوا برة المتاهة

كل عام وانت الحبيب

يارسول الله يا طه

كل عام أقصانا ينزف

كل نقطة بألف أهه

يوم ميلاد طه الحبيب

اللى بيه مجروح يطيب

أدعوا والمولى مجيب

نخرجوا برة المتاهة

قدسنا الغالى يعود

قبل مايفوت الأوان

نفتكر عهد الجدود

والفاروق أيام زمان

يومها عمر العين ما تدمع

والإيمان فى الفلب يلمع

لما نور الأقصى يسطع

ترفع الكعبة الأذان

قلبك ياشاعر باب

لو غاب شعاع الشمس

فى الكون البعيد

والليل هجم ع القلب

بجناحه العنيد

قلبك يا شاعر باب

مفتوح على الأجناب

حتى الزمن لو شاب

يرجع شبابه أكيد

ويغنى غنوة شوق

يطلع نهاره شروق

والشمس تغزل ضوء

للفجر الوليد

قلبك ياشاعر كون

مهما الطريق حيكون

غاضب قوى ومجنون

قلمك حيرسم عيد