انت العالم

ما تزوّدش البُعد عليّا/ وتسيب قلبى حزين وحدانى


وان كان عقلك قاسى شوية/ قلبك حيجيبك من تانى



وما تسمحش لوقتك ياخدك/ إرجع تانى يا طيرى لعشك


ياسمينتك دايما تندهلك/محتاجة لحضنك يا أنانى


*************


يوم ورا يوم ورا يوم بيعدوا/ والأيام بتمر سنين


قولت يومين ع الإيد يتعدوا/ غيبت وحشكى البُعد لمين


وانت العالم كله ف عينى/ منك ليك شكوتى وأنينى


راجع بالأشواق تنادينى / والا اختارت خلاص تنسانى


محتاجة لحضنك يا أنانى


*********************
عقلى ف حيرة وقلبى ف حيرة / والأفكار بتجيب وتودى


ساعة تاخدنى لسكة غيرة / ساعة تجيب الحزن لحدّى


ياقمر طمن قلبى عليه / وانت يا شمس بدفا ضميه


خايفة البُعد يأثر فيه / وأما يعود ما يكونش عشاني


محتاجة لحضنك... يا أنانى



*********************

يا غزة يا ام الغطا أحمر> والدم صابغ كل أركانك

ليه النهار يا غزة متأخّر > ليه الظلام بيسد أبوابك

عاش اللى باع دمه فدا ليكى >مات اللى عاش وكلاب حواليكى

يا غزة يا مؤمنة وبدمى افديكى >تروى التراب منى وتحنى ف كعابك

يا غزة يا جرحي

صدر الولاد درعك

ياغزة مهما يكون

احلف عشان خاطرك

أنزف واغطى الكون

وأكحّل العميان

يا غزة من دمى

واصرخ فى كل أدان

دمى فدا أمى

يمكن ولد بيشوف

يكسر جدار الخوف

يرفع ادان صبحى

يا غزة يا جرحى

دم الولاد أنهار

من تحت كل جدار

حالف يعود بنهار

على غنوته تصحى

على غنوته تصحى

ساعات ننهار‎

ساعات الجرح يا غزة

يكون أكبر من الأشعار

ساعات نسكت ساعات نبكى

ساعات نصرخ ساعات ننهار

ياغزة الضعف خلانا

نكون لعبة مع التيار

جيوشنا ونايمة فى التوهة

عقول حكامنا معتوهة

وبين التوهة والتوهة

بنشرب من جراحنا مرار

يا غزة مافيش كلام يتقال

صلاح الدين ماهوش راجع

ولا خلّف يا غزة عيال

كبير أبطالنا ياغزة

يغنّوا للوطن موال

ويبنو المجد بأغانى

حروفها تقولش كام زلزال

ووقت الشدة ما نلاقى

ولا فرسان ولا أبطال

أقولك إيه وانا دمعى

على ولادك كوانى بنار

مافيش غيره اله واحد

عليم بينا كريم جبار