فات النهار الصبى ولا سابش ذرة وهج

حتى القمر انكسر واهو ساب سمانا وهج

يا دنيا يا مروّحة واحنا اللى عاشقينك

يا ريتنا زى القمر نمشى على ده النهج

رباعيات

يا داعى الدعوة ما تجوزشى على الحريمات

عشان قلبك حيستغفر تلت مرات

ف يوم ما تحس دى امك ودى اختك ودى بنتك

تقول العيب يا رجالة ............ من الشنبات

**************

مستنيين ردكوا لجل العلام ما يكون

يا اساتذة من فضلكوا احنا اتملينا ظنون

وفهمونا ازاى ...... نكتب رباعية

تكون كلام يتقرى فى المعنى والمضمون

*****************

قلبى اللى انت قطعته بايدك

بعد ما كان بيغزى وريدك

كنت تسيبله يا دوبك حته

علشان يقدر يوم يدعيلك

وسام

مش عيد لميلاد

ده ميلاد للعيد

نورت يا واد

كل المواليد

حتى الايام

الضلمه قوام

حلفت ما تنام

لبستله جديد

ده وسام للعيد

في الدنيا دى عيد

نورت يا واد

كل المواليد

كنا زمان

كنا صحاب اربعة

واحد خسيس

واحد لئيم

واحد جبان

والرابع انا

مانيش ملاك

انما

انا انسان

***********************

الدار ده كان بيحب لمتنا

والجدة ويا الام لمتنا

راحوا اللى كان بالحب ساكنينه

واحنا فضلنا فيه ولم متنا

رباعيات (( الحب وعمايله ))

دق الهوى باب النهار اختل

مابقاش يفرّق بين الشموس والضل

ماشى كما المسطول بيتطوّح

باس النجيل لخضر وداس عالفل

************

قلبى يا نص رغيف لكن مشبّعنى

ليه جى عز الصيف ياقلبى تخدعنى

تبعتلى نسمة هوا افتحلها الشباك

الاقيك كما البركان بالحب ولعنى

سامية

وسط موج البحر وحدى

والسفن غرقانة جنبى

والصراع موت او حياه

واما قلت وداع يا دنيا

جيتى انت يا احلى سامية

بين ايديكى طوق نجاه

كنتى بنتى... كنتى اختى

وقت جرحى كنتى امى

اللى شايلة كل همى

قبل ما انطق اى اه

دانا دانا دانا

دانا دانا دانا

والايام واخدانا

نهرب ونروح فين

والاشواق دى معانا

دانا يا نور العين

قلبك لسه خضار

فيه اشواق وحنين

بكر كأنه نهار

بنتى يا روح الروح

بيكى بعيش وبدوب

واتحمل فى جروح

وارضى ابات مغلوب

بس عشانك انت

بتحمل واتحمل

وارضى الجرح يابنتى

واشيلك واكمل

واما ياخدنى الهم

ودموعى بتستعفى

بدعى بقلب الام

لو اشوفك فى الزفة

تملا الفرحة زمانى

واخدك بين احضانى

وافضل اقول من تانى

اجمل حاجة معانا

دانا دانا دانا

إنزف دمي

بتقول صاحبى!

وانت ف كل مناسبة بشوفك

ماسك خنجر وبتطعنى

بتقول صاحبى

وانت الجرح الساكن قلبى

لا يا صاحبى

عمر الحب ماكان اشواك

ولا كان طعنة ف قلبى وجنبى

لا يا صاحبى

كنت بفكر انك منى

كنت ف قلب عينية الننى

فجاه اشوفك قدام منى

ضحكة بريئة

واما اتلفت

القى الضحكة دى طعنة جريئة

ابكى عليك

والا على الايام الفايتة

على اخلاصى ف كل دقيقة

كنت بحسك فعلا منى

كنت ف قلبى ابويا وابنى

واما لقيت مع غيرى طريقك

روحت بغدر وقسوة بايعنى

لا يا صاحبى

كل اللى انت عملته معايا

بكرة عليك الدور صدقنى

مش راح اسيبك تنزف دمى

واما الجرح يدق ببانك

ايدى حتسبق تمسح جرحك

حتى ان خدت الجرح ف قلبى

اصحى يا صاحبى

اصحى يا صاحبى

اصحى يا

صاحبى