بحر الحياة بيضخ دموع
بس العيون ما باقتش تحس
مش ضعف لا.... كل الموضوع
جانا النهار.... وما جابش الشمس

كفيف الروح

يا أدم مهما تستعفى

وتمشى بعيد وتتخفى

أكيد البرد حيجيبك

لحد عيونى تتدفى

ولما الدنيا بتعاندك

وبحر الحزن بيشدك

تلاقينى أنا أمك

وحضنى البر والضفة

ف قلبى زهر أيامك

وكفى بساط لأحلامك

ولو حتعيش ف أوهامك

ومن غيرى حتستكفى

بحور الحزن حتشدك

لألف طريق وحتهدك

تصارع موجها ولواحدك

بلا مركب.. ولا دفة

تروح ف الدنيا مهما تروح

حتفضل زى طير مجروح

تعيش واحدك كفيف الروح

بدون عكاز .. وعين شايفة

ماتصدقش

ما تصــدقش كلامــهم عنى ** مهما يقولوا حتفضل مني
حفضل طول العمر حبيبتك **وانت ف قلب عينية الننى
ماتصدقش
قبـلك جولى كتيـر يقولــولى **بالروايــات يحــكوها عــليــك
انك قــاسى وقلبك قــاسى** وان الغـــدر ده طبــع مــاليـــك
واما قفلت الباب لكلامهم ** وامــا رفــضت كــمان أسمــعهم
كل الحــقد إتمــلّك منهم ** راحــو عليــك علشـان تخاصمنى
ماتصدقش
رُد الـباب علـى أى كـلام **ولا تسـمعش لواحد منهم
بـكرة الحـقد مع الأيـام** يصـبح نار فـيهـم تحـرقــهم
واحنا نعيش كما عصفورتين** بجناح الأشواق طايرين
كــل العالم . يطــلع مين **قــلبك بـس اللـى يقــدرنى
ماتصدقش

الفستان لبساه علشانك

والماكياج حطاه علشانك

بس الحظ الاأسود خلّى

بره البيت دايما يحلالك

تعمل الفين حجة وتخرج

أخر الليل ترجع تتطّوح

واما اندب على حظى وانوّح

ولا عمرك يتغيّر حالك

طيب شوف طلباتنا الأول

ياخى مليون خيبة على جنابك

لولا عيالى ل الم عزالى

واجرى اتدارى ف وسط خواتى

وانت يا جملى يا ضبعى يا سبعى

خليك فى الأحوال دى ليلاتى

ضبعى وسبعى.!.. ألفين خيبة

هو السبع طعامه نباتى؟!

لأ وتلومنى لما اتساير

ساعة وافضفض مع صاحباتى

وانت مقضّى اليوم فى القهوة

مرة نجاتى ومرة بخاتى

يتعب ابنك ولا بتفكّر

تتعب بنتك ولا بتقدّر

لأ وتخلّى الجو معكّر

لما تبدّر ساعة وترجع

تخبط ترزع

على أتفه أسباب وتولّع

ف الشقة حريقة مع ولادى

أعمل إيه حظى ومكتوبلى

كل الناس تعرف مأساتى

لا ياحبيبي

دايما كده طبعك مش عادى
وانا شقيانة ف شغل البيت
أغسل واطبخ واكوى وادادى
وعيالك دايما عفاريت
أنا مهدودة ف ليل ونهار
تبقى ف تلج وقلبى ف نار
واما أغير تعملى محاكمة
وتحسسنى بانى الظالمة
تعمل حجة وتنزل تجرى
وانا أنكت من حيرتى وأهرى

تيجى ف وش الفجر كأنك
جى لوكاندة نوم ولا همك
جى تتطوّح داير لافف
وبتتلفت ماشى وخايف
هو القلم الجاف راح يطبع
ع المنديل يا حبيبى شفايف
بص حقولك.. ادينى ودنك
قبل ما اقول للخلق عمايلك
روح كمّل سهرك عند امك
روح كمّل سهرك عند امك