الثلاثاء، 30 يونيو 2009

رد . تمنيت ان اكتب اسمك


مش مهم الكون يسجل

إسمى أو يوم ينطقه

مش مهم حروفى تبقى ف القصايد

عمر قلبى ما يسعده

حتى لو كل الأغانى

واخدة إسمى تردده

السعادة بجد إنّك

إنت واحدك توجده

كل حرف تقوله حتما

فى الزمان.. حتخلّده
...............................

الاثنين، 29 يونيو 2009


رغم كل الجرح منك



غصب عنى بحنلك



كان منايا امد ايدى



جوه قلبى وانسلك

رد . رباعيات


سر السعادة أكيد

بشقاك عشان حلمك

إتعب عشان ترتاح

وتضمه ويضمك

لكن تقول يا بخت

وتعيش بتستناه

حتتوه مابين أحزان

ويضيع كمان عمرك
.
****************

ظالم وفين راح اروح

من ظلمه يا زمانى

من يوم ما جلبى عشج

والأهه لزمانى

حاولت اغيّر كتير

من طبعه ما اتغيّر

وفضلت بين نارين

عيشة فى أزمة انى
,
****************

صبرك دا حبة كلام

بتقوله ليل ونهار

وكتير تقول مظلوم

تبكى الدموع أنهار

وانا اللى شوفت كتير

م القسوة فى غرامك

عمرى ما قولت حرام

وانا كل يوم بنهار
,
**********

يا سندباد بتقول

على بحرنا عالى

وكنت دايما تقول

النوّ يحلالى

دلوقتى ايه غيّرك

بدّل ف أحوالك

من أى نسمة هوا

بتولّى طوّالى

الخميس، 25 يونيو 2009





عمر المطر ما حينهمر

من غيمة عاشقة للكسل

إرحل يا شاعر فى الدروب

من سار طريق الشوق وصل

ومهما طال الليل عليك

راجع نهارك مكتمل

دوّر على الطير الغريد

يصبح غُناك المحتمل

لكن حذارى من الغراب

ياخدك طريقه وفيه تضل

( دالنحل فى الأرض الخراب

م المستحيل ينتج عسل)
................................
ما تلومش كتير ع الدنيا

الدنيا دى بس طريق

قدامك لو تتجمّل

وتكون زى الأباريق

إملاها بطاعة ربك

فى الحر تبّل الريق

تاخدك لطريق الجنة

وتنول كل ما تتمنى

وما دام المولى شايفنا

والقلب بطاعته برئ

حتشوف الدنيا جميلة

علشان للجنة طريق..
............................


أشكرك من كل قلبى


يا قمر فى الحسن أية


زاد كتير الفرح عندى


لما حسّيتك معايا


إنت فعلا وردة نادية


عطرها يخلّى هوايا


يبقى عز الحر نسمة


جايبة أفراحى وهنايا


أما عز البرد بسمة


شايلة م الجنة دفايا


دانت يا ميمونة دايما


شمس بتنوّر سمايا
..............................

السبت، 20 يونيو 2009

نخيل النيل



نخيل النيل ما يوم وطّى

دا ساجد للإله تسابيح

ومهما الريح

تحاول كتم أنفاسه

بيرفع للإله راسه

وينده تيجى حراسه

تصد الريح

يا بنت النيل يا مصرية

يا فاردة الشعر ع الميّة

بإيدك تتملى الزلعة

وتروى الأرض حنيّة

فتطرح نخل أبريمى

وترقص رقصة بدوية

تدق الطبلة فى النوبة

يسقف لسكندرانية

وتبقى انتى فى وسطيهم

كما النجمة الملالية

وترمى الضى ع العالم

يعودالضى أغنية

تلاقى الكل بيردد

صباح الخير نفرتيتى

صباح الخير يا مصرية

الجمعة، 19 يونيو 2009

ا ذنب عشقت ارتكابه \\ رد على رائعه رنا (( بلا قلب ))


لا تقولى إنكِ بلا قلب

فمنذ ذلك اليوم البعيد

وقلبى يدق فى صدرك

لا تخدعينى ثانية

فإن كان غرامك ذنباً

فأعلن أنّى...

سوف أرتكبه مرارا

وأعلن أنّى...

سوف أفتح صدرى للنار

وسآمر كل ديوك مدينتى

أن ترفع كل صباح

صوت أذانها باسمك

لا تخدعينى ثانية

فإن كنتى جزءا منى

فأنا كلك
.......................

عيونك القمرة


وغيبت يومين عشان أعرف

أنا جواكى أو برة

لقيت قلبى اللى زاد دقه

فى بُعدك قاد صبح جمرة

أحايل فيه ما يقبلشى

أمد الإيد ما سلمشى

رجعت لسكتك أمشى

سحبنى بشوقه وبسرعة

لقيتنى رجعت لمكانى

وشوفت عنيكى عنوانى

محال أقبل أغيب تانى

واسيب الجنة والخضرة

عيونك جنتى ونارى

وحضنك فى الغرام دارى

ولو فى الليل يا مشوارى

حتبقى عيونك القمرة

مش كل ضحكة يكون

معناها قلب سعيد

ولا كل دمعة عين

بتكون من التنهيد

ياما دموع بتكون

فى الفرح غرقانة

وكتير من الضحكات

فى الحزن غرقانة

ومدام فى دنيا البشر

عايشين يا دوب مرة

يا غادة ليه تحزنى

إرمى الهموم برة

وخلى صوت الغنا

ينطق انا حرة

حتلاقى حتى الظلام

يرجع بفجر جديد

الثلاثاء، 16 يونيو 2009


فين الكتاب؟

مدفون فى بيت إسود كبير

بابه الأخير

مرسوم عليه صورة غراب

مكتوب وبالخط العريض

مسموح لكم بالإقتراب

علشان تدوقوا النار هناك

تستطعموا طعم العذاب

لكن يابو القلب الخضار

مهما يطول زمن الخراب

حتما نهارك راح يعود

من بعد طول الإحتجاب

وتهل شمسك من جديد

ورداية فوق خد السحاب


ما تستسلمش

طريقك فى الهوى مفتوح

فإحلم قد ما تقدر

وعيش الحلم جسم وروح

بلاش تضعف قصاد نفسك

وما تروحش لطريق ياسك

مدام الورد من غرسك

أكيد يبقى العبير مسموح

فعيش الحلم جسم وروح

تقدر تبعد؟

إبعد لكن

بكرة أكيد راح ترجع تانى

لما تدوق الجرح ف بعدى

لما تقاسى كتير وتعانى

دنا ف عيونى الشمس الطالة

عيش ف الليل واحدك وانسانى

حبعد زى ما قولت لكنك

بكرة هتيجى وتترجانى

وانا من طيبتى همد ايديّا

وهطبطب على قلبك تانى

لكن لو حتسوق فى عنادك

هبعد وهقولك تنسانى

قلبى الطيب ملكى لواحدى

مش حيروح مع قلب انانى

السبت، 13 يونيو 2009

فرح بنتى


تزغرط دموعى وترقص عينيّا

وحاجة بتاخدنى غريبة عليّا

وانا واقفة جنبك

أقيسلك فى دهبك

عشان بكره رايحة

ياهالة لدنيا

شريط فات فى ثانية

ياهالة يا نوسة

وتكبر وتكبر وتصبح عروسة

أخدها فى حضنى

حبيبتى يابنتى

وأبكى وأضحك وترقص عينيّا

نصيحتى تكونى كوردة نديّة

لجوزك وبيتك ونسمة ذكية

وتبقى فى عز الضلام الشموع

وتبقى فى عز النهار الحورية

نصيحتى ياعارف تكون الأمان

وتروى ورودها بحب وحنان

تطبطب عليها فى وقت الدموع

وتاخد إيديها لأجمل مكان

وبدعى ياربى تصون القلوب

ما يدخل ما بنهم حسود أو حقود

واملّى عينيّا بأول ولود

يقولى يا تيتا

بحبك يا تيتا

واقوله يا عمرى يا أجمل هدية
......................................

الأربعاء، 10 يونيو 2009

رد على تواصل سيدة الشولي

إذا كان مجنون

انا منه أجنّ

وإذا كان حيجينى ف يوم ويحنّ

حعمل نسياه

ولانيش عارفاه

مع إنّى بجد بدوب فى هواه

لكن علشان

يتهدى ويكنّ

واذا كان مجنون.....

أنا منه أجن

السبت، 6 يونيو 2009

دعوة فرح


دَعَوْتُ كُلَ عزيز زان أفراحـي

حُضُورُهُ شَرَفٌ والـوِّدُ مفتاحـي

و(هالَةُ )النُورِ تَدعو كُلَّ صَاحِبَةٍ

و(عَارِفُ) القلبِ عطٌر فَوقَ قُدَّاحِ

فمرحَبَاً بِِكمُ حَـلَّ السُـرورُ بِنَـا

وَوَحَّـدَ اللهُ أرواحَـاًَ بــأرواحِِ
ثروت سليم

الجمعة، 5 يونيو 2009


لما الطرق تصبح تابوت


واما السما تصبح كفن

ايه راح يكون غير السكوت

وسط المقابر والعدم

لبس النهار غيم الحداد

والليل نجومه بتندفن

ما تلومش ع العين فى الظلام

دالضى جوانا انسجن

لما النفوس الطيبة

نامت على كفوف المحن

واللى فضل حبة نفوس

مبتورة وضمير من عطن

الأربعاء، 3 يونيو 2009


تصدق لقيتنى مصدّق قوى

وفجأة لقيتنى مكدّب قوى

بينطق لسانك بغير الحقيقة

وشايفة ف عيونك وقلبك حريقة

تحاول تدارى وتنجح دقيقة

وفى التانية تفشل وتظهر قوى

نصيحتى حقولها وإفهم لواحدك

ح تكدب...
عيونك بتفضح حقيقتك

ولو مش مصدّق حسيبك براحتك

طريق المشاعر ما يوم يتلوي

فقول اللى عندك ودايما حقولك

بإنى لكلامك...... مكدّب قوى