الأحد، 30 نوفمبر 2008

الصبر

الصبر ياهل القلم دا نعمة ف الأيام
.
يشتد بينا الألم تنزف جراحنا كلام
.
يحدف كلامنا ضيا على سكة المجاريح
.
يرتاحوا بعد الضنا ويعيشوا ف الأحلام

احبك

أكيد الشمس بتدفّي لكين بالليل بتتخفّى

وساعة بييجى يأذينا شعاعها لما يستعفّى

لكنه الحب شئ تانى دفاه فى الكون مالوهش مثيل

بتييجى الشمس على بابه عشان من طعمه تتدفّى

السبت، 15 نوفمبر 2008

هاله


حبيبتى خلاص قصاد عينى

بقت فى الزفة قمراية

وكنتى من زمان عدى

ياهالة ف قلبى غنواية

وشمسك قبل ما تهلي

شعاعها بيحبى جوايا

كبرتى ياروحى دلوقتى

وشوفتك دنيتى انتى

تنادى يا ماما ياحبيبتى

خديلك صورة ويايا


دموع الفرحة تسبقنى

وافرد حضنى وأضمك

أشيل الطرحة بإيديّا

وأقطف وردة من خدك

وابص بعينى واتأمل

جمالك عمرى ما استكفى

حبيبتى خلاص بقت نجمة

وواقفة قصادى فى الزفة

ألاقى القلب بيزغرط

وترقص روحى ويايا

دى بنتى خلاص قصاد عينى

بقت فى الزفة قمراية

الجمعة، 14 نوفمبر 2008


فعلا عاشقاك بجنون

يابو قلب رقيق وحنون


وان عدت نسمة قصادك

يبنيلك قلبى حصون


واسرح بخيالى وعينى

فى الحب اللى مدفينى


والغيرة ف ثانية تجينى

ترمينى ف بحر ظنون


قلبك على بري بجد

أو راح للبر التانى


وان صادف زاره المد

حيروح على اى موانى


وافضل محتارة وظنى

بيروح لبعيد وياخدنى


وأحس ف لحظة كأنى

من غيرك عمرى ماكون


رسى القلب اللى هواك

ريحنى من الأفكار


حتاخدنى الجنة معاك

والا حترمينى النار


صدقنى الجنة ف قربك

ياحبيبى بجد بحبك


من غير حتى ما أحلفلك

إعرف إن انت الكون


يابو قلب رقيق وحنون